O C.I.M. Centro de Información á Muller da Mancomunidade de Municipios da Comarca de Verín é un centro recoñecido e acreditado pola Xunta de Galicia (segundo o DECRETO 130/2016, do 15 de setembro, polo que se establecen os requisitos e o procedemento para o recoñecemento e acreditación dos centros de información á muller de titularidade das entidades locais de Galicia).
O centro ten carácter municipal e presta os servizos nos sete concellos que forman parte da Mancomunidade de Municipios da Comarca de Verín.
Principios informadores e de actuación do centro:
- O respecto ao principio de confidencialidade por parte do persoal do CIM.
- O respecto á vontade das persoas usuarias na busca das posibles solucións e alternativas ás consultas expostas.
- A prestación gratuíta de todos os servizos, que se ofertarán atendendo á vocación de servizo público.
- Coordinación cos servizos sociais comunitarios e demais servizos municipais co obxecto de prestar unha mellor atención ás persoas usuarias e un exercicio máis eficaz das funcións propias do CIM.
- A colaboración coas demais administracións públicas e, especialmente, co órgano competente en materia de igualdade da Administración xeral da Comunidade Autónoma de Galicia.
Servizos que ofrece o C.I.M:
- Atención social
- Atención psicolóxica
- Atención legal
- Atención e orientación laboral
- Dinamización comunitaria (campañas de sensibilización, xornadas, programas de voluntariado etc.)
Funcións do C.I.M. da Mancomunidade de Municipios da Comarca de Verín:
- Asesoramento xurídico e atención psicolóxica especializada en violencia de xénero, doméstica e trata/explotación sexual. Dereito de familia.
- Atención específica ás mulleres vítimas de violencia de xénero e, de ser o caso, ás fillas, fillos e persoas menores ao cargo da muller vítima, ou maiores dependentes, facilitando o acceso aos recursos existentes na Comunidade Autónoma, incluíndo a xestión urxente cos servizos policiais, sanitarios, psicolóxicos, xudiciais e sociais que sexan oportunos.
- Atención específica a mulleres en situación de especial vulnerabilidade co obxectivo de mellorar a súa situación persoal, social ou laboral.
- Información sobre os recursos dispoñibles no seu ámbito territorial.
- Difusión e sensibilización cidadá acerca da vixencia e aplicación do principio de igualdade entre mulleres e homes e da necesidade da consecución de igualdade de dereitos e de integración social do colectivo LGTBI.
- Atención e integración do colectivo LGTBI.
- Información sobre cursos, estudos e xornadas en materia de igualdade de oportunidades, tanto no ámbito de xénero como para o colectivo LGTBI.
- Realización de conferencias, encontros, xornadas e cursos sobre temas de especial incidencia na consecución do principio de igualdade, tanto no relacionado co xénero como coa temática da diversidade sexual.
- Actuacións de dinamización levadas a cabo por persoas expertas en xénero e igualdade, cara á integración da perspectiva de xénero nos programas e actuacións que desenvolve a entidade local, así como o establecemento de canles de comunicación e colaboración con outros axentes presentes no territorio.
- Recepción de denuncias e queixas en materia de discriminación por razón de xénero ou por razón da identidade ou orientación sexual no ámbito da publicidade e nos medios de comunicación.
- Fomento do asociacionismo e da participación comunitaria.
- Fomento do asociacionismo do colectivo LGTBI e de actividades encamiñadas á súa integración efectiva en todos os ámbitos da vida social e económica.
- Calquera outra actividade que se adecúe ao obxectivo prioritario da consecución da igualdade, sobre todo nos ámbitos laboral e social.
O C.I.M. da Mancomunidade de Verín promociona as súas actividades nas redes sociais @mancoverincim tanto en Instagram como en Facebook.
C.I.M Mancomunidade de Municipios da Comarca de Verín
Rúa Cancelón 1, baixo 32600 Verín – Ourense
Teléfono: 988411314 / 988414600
Correo: cim@mancoverin.gal dinamizacioncim@gmail.com
