A Mancomunidade de Municipios da Comarca de Verín acaba de aprobar novidades en relación ó servizo R.S.U (Residuos Sólidos Urbanos) que entrarán en vigor hoxe, 1 de abril de 2025.
Dende a data actual prestarán o servizo en conxunto o Concello de Monterrei, Cualedro e Laza. O servizo de recollida de lixo pasará a ser xestionado directamente pola entidade local, coa finalidade de optimizar o servizo e tamén manter a taxa anual de recollida a cargo dos/as veciños/as.
Para este ano 2025, a taxa correspondente a este servizo será a seguinte:
- Concello de Monterrei: 52,47 € anual
- Concello de Laza: 51 € anual
- Concello de Cualedro: 52,47 € anual
Debido ós desafíos únicos que presenta o rural na xestión dos residuos como son a escasa infraestrutura, a baixa densidade de poboación e a dificultade loxística, a Mancomunidade de Municipios da Comarca de Verín propón a incorporación das seguintes medidas:
Novas estratexias de recollida
Coa finalidade de manter o custe do servizo será necesario trazar novas rutas estratéxicas de recollida de lixo, agrupación ou organización dos colectores do lixo.
Apoio a sustentabilidade
Serán postos á disposición da veciñanza colectores de compostaxe. O futuro implica apostar polo correcto tratamento dos biorresiduos (restos de alimentos, podas etc.). A finalidade é que deixemos de tratar igual os residuos orgánicos dos que non o son, promovendo numerosos beneficios medio ambientais, sociais e económicos.
Sensibilidade medio ambiental
O futuro da boa xestión dos residuos implica concienciar á comunidade sobre a importancia do uso responsable dos servizos e o respecto ó medio ambiente. Por todo isto, a Mancomunidade de Municipios da Comarca de Verín pide a colaboración activa da veciñanza para o coidado e protección do medio ambiente no rural. Apostar polas tres R: “Reducir, Reciclar, Reutilizar”.
